做鬼都唔靈（下）
上集：http://bit.do/eSK4e
我磨拳擦掌，又諗住去幫佢。
福伯叫停我：「喂，你上次都衰咗，今次仲嚟？」
「今時唔同往日，我嘅法力進步咗，我已經可以托夢，有能力幫佢㗎。」
我好心急咁解釋：「同埋仔仔開聲，需要我嘅幫助，我點可以唔幫佢？」
福伯好認真咁講：「我覺得，啲人話想『在天之靈保佑乜乜乜』，只係搵個心靈慰藉，而唔係真係希望，先人嘅靈魂飄出嚟幫手......」
我當然無聽福伯講，佢只係一隻從來唔修煉嘅懶鬼，我跟住仔仔，離開墓地。
好快我就見到仔仔嘅心上人芬芬，我開始跟隨芬芬。
我發現，芬芬都有向朋友提起過仔仔，佢話，佢對仔仔有好感，但覺得仔仔無咩「安全感」，所以有啲搖擺不定。
當晚我就托夢畀芬芬，苦口婆心咁話畀佢知，仔仔有幾善良，幾適合做老公。
芬芬好警惕咁望住我，問我係邊個。
我當然唔可以講真話，我就好嚴肅咁答：「我係指引你未來嘅神靈！」
第二日，芬芬都無應承仔仔嘅表白，我又托夢畀佢，詳細解釋仔仔嘅好處。
第三晚、第四晚......第五日，芬芬終於主動搵仔仔。
但場景並唔係我想像中咁甜蜜，相反，芬芬怒氣沖沖：「估唔到你咁卑鄙，居然落我降頭？」
仔仔好困惑：「我邊有落你降頭？」
「我每晚發夢，都夢見一個猥瑣阿叔，係咁讚你好，叫我同你一齊，仲唔係你落我降頭？」芬芬指住仔仔大鬧。
無論仔仔點解釋，芬芬都唔肯接受，仲Block晒仔仔所有聯絡方法。
我本來諗住，等芬芬瞓著覺，我再托夢向佢解釋成件事。
但係，芬芬一轉身，就走去個廟度，求咗一道驅鬼符。
從此，我無論點樣努力，都入唔到芬芬嘅夢境。
見仔仔鬱鬱寡歡，我又心痛，又愧疚，又無勇氣向佢道歉。
我諗，搞成咁，都係因為我法力未夠。
如果我法力強大到，可以破開驅鬼符，甚至直接影響人嘅諗法，呢次我就會真正幫到仔仔。
我再次返去墓地，繼續修煉。
值得慶幸嘅係，仔仔後來識咗另一個女仔，拍拖結婚，過得好開心。
佢都有定時嚟掃墓，話我知佢有幾幸福，亦無向我祈求啲乜嘢。
福伯就同我講：「咁咪好囉，佢無嘢要你幫，你就唔駛再修煉。」
雖然呢個建議好吸引，但我態度堅決：「防患勝於未然，我嘅法力夠強，第日先有機會幫到佢！」
十年後嘅清明節，新抱一個人嚟掃墓。
佢喊住話我知，仔仔患上肝癌，危在旦夕。
「老爺，您在天之靈，保佑您個仔平安度過啦！」
我當然會保佑我個仔！我毫不猶豫咁跟住新抱，去到醫院，見到病床上虛弱嘅仔仔。
我聽到醫生講，仔仔需要器官移植，但無親人適合移植，依加等緊屍肝。
「咁會唔會等得到啊？」新抱好心急咁問。
醫生答：「雖然佢排到最前，但佢情況危殆，要喺咁短時間內，啱啱好有人過身，而又符合佢嘅血型......機會唔大。」
新抱嚎啕大哭，我呆若木雞。
仔仔先三十八歲，佢仲有好長嘅路要行，佢可以享受好多嘅幸福。
我苦修多年，唔通我要眼睜睜睇住佢死？
我好苦惱，漫無目的咁喺條街度飄，我幻想眼前會突然出現一個神醫，話我知佢可以醫好我個仔。
但我無見到神醫，我見到一個器官捐贈嘅攤位，幾個義工企喺度，呼籲大家簽署器官捐贈卡，死後遺愛人間。
呢個時候，有一對情侶路過，個女仔問：「BB你點睇器官捐贈啊？」
男仔答：「我簽咗啦，萬一我有咩事，心肝脾肺腎都捐晒㗎。你知啦，我又係O型血，幫到好多人。」
女仔展顏一笑：「BB你心地真係好。」
佢係O型血，仔仔都係O型血。
假如、萬一、如果、幸運地，個男仔今日死咗，仔仔係唔係有得救？
但係一個壯年男子，有無可能咁啱就喺呢兩日暴斃？
除非......我出手。
我知道我要做嘅，係一件壞事。
但係我修煉咗咁多年，都只係希望仔仔可以幸福咁生活落去。
考試我幫唔到佢，追女仔我仲害咗佢，唔通佢就嚟死，我都救唔到佢？
以我修煉多年嘅法力，我已經可以接觸到人體。
個男仔企喺馬路邊，一架車經過，我正想推佢出馬路。
但我嘅手接觸到佢背脊嗰一刻，我無用到力，我......落唔到手。
我想做啲咩？我想為咗救我個仔，殺一個無辜嘅好心人？
但我唔殺佢，我要睇住個仔死？
我又自責又掙扎，灰溜溜咁返咗墓地。
福伯見我神色唔對路，問我咩事，我講晒出嚟。
「我唔修煉，因為我知道，我哋唔應該用法力，幫親人作弊。」
福伯嘆氣：「每個人，都有自己嘅路要行，可能係生路，都可能係死路。」
「唔通我睇住個仔死？」我好心痛。
福伯反問：「咁你有無問過你個仔？佢想唔想你咁做？」
我呆咗，我因為渴望仔仔生存落去，一廂情願咁幫佢做決定。
仔仔咁善良，假如佢知道我做嘅事，話唔定佢寧願死，都唔想害人。
我終於明白，點解福伯話自己有百幾歲人嘅有智慧，就唔需要法力。
因為佢好清楚，愛一個人，總係希望佢幸福快樂，事事如意，但真實嘅人生，點會一帆風順。
每人都會遇到自己嘅難題，可能搞得掂，可能從此玩完。
但無論係點，每個人，都有自己嘅路要行。
愛得再深，都無辦法代佢行。
－完－
將專頁設定為「搶先看」/ "See first"，最新故仔馬上睇！
沒有怪獸家長的世界：https://goo.gl/cyTZTU
我係一個三歲細路：http://bit.do/eQuGy
#短故 #短篇 #小說 #陳美濤 #廣東話 #粵語 #tomatochan #做鬼都唔靈
Search